Eses africanos que veñen.
Carlos Casares.
28 de agosto do 1992
Eses
africanos famentos que atravesan o Estreito con perigo para vir recoller as
farangullas que nos sobran ós demais, traenme á memoria un episodio sucedido
hai anos nas terras da Limia, concretamente na parroquia do Sabucedo, onde meu
tío exercía de médico rural. Unha mañá terrible de frío, auga e vento, ó meu
tío entroulle polo patio adiante unha grea fantasmal de homes mollados e
aterecidos, con barba de días, moitos deles enfermos e con febre, e todos cheos
de fame e miseria.
Eran
portugueses que ían camiño de Francia. Un negreiro tiña comerciado con eles.
Despois de cobrarlles un anticipo tróuxoos dando tombos e voltas polos montes,
camiñando en forma de ese ou zig - zag, para que pensaran que a ruta era longa
pero sen avanzar máis de doce quilómetros en varios días. Finalmente situounos
fronte ó canal de desaugue da Lagoa de Antela e díxolles que Francia estaba do
outro lado.
Un
bicho sen alma como este que mandaba a aqueles portugueses a unha morte segura,
dada a forza das augas do canal naqueles días de natureza desbordada. Está
sempre detrás de cada grupiño destes africanos que colle a Policía
española ou que naufragan antes de
chegar á terra soñada. Sempre a miseria duns lles sirve a outros para gañar
cartos. Son diñeiros podres, horrible “calderilla” acuñada no inferno, pura
moeda de Satanás . Ogallá a teñan que gastar en mediciñas.
Publicado na Voz de Galicia na sección “ Á Marxe” .
Pódese consultar na hemeroteca.
-Podes dicir a data do
artigo periodístico de Carlos Casares ?
- Busca no mapa a comarca da Limia .
- Límites xeográficos e políticos da Galicia . País, rexións autonómicas. Localiza o río Limia nun mapa de Galicia.
- Que significa a palabra "negreiro"?
- Por que portugueses?
- Pregunta ti tamén : Onde sucedeu ? Quen son os protagonistas?
- Podes facer unha ilustración para o artigo de Carlos Casares Un colage coas imaxes da prensa , un debuxo ... .
_________________________________________________________________________
Competencia Social Cívica – CConciencia e Expresións Culturais – Competencia Comunicación Lingüística
- Por que portugueses?
- Pregunta ti tamén : Onde sucedeu ? Quen son os protagonistas?
- Podes facer unha ilustración para o artigo de Carlos Casares Un colage coas imaxes da prensa , un debuxo ... .
_________________________________________________________________________
Que di o curriculum? Algunha cousiñas para guiar o deseño de actividades
- B3.2.Manifestacións culturais e lingüísticas de Galicia Contido
- B3.2.Valorar a diversidade cultural, social, política e lingüística de Galicia respectando as diferenzas. Criterio de Avaliación
-
CSB3.2.1.Recoñece, partindo da realidade galega, a diversidade
cultural, social, política e lingüística nun mesmo territorio como fonte
de enriquecemento cultural. Estándar
Competencias Sociais e Cívicas - Conciencia e Expresións Culturais
-
B3.7.Os movementos migratorios: éxodo rural, a emigración a Europa, a
chegada de emigrantes ao noso país, problemas actuais da poboación.
Estudo dos movementos migratorios da familia. Contido
-
B3.4.Describir os movementos migratorios da poboación galega e de
España explicando o éxodo rural, a emigración a Europa, e a chegada de
emigrantes ao noso país e identificar os problemas actuais da poboación.
- CSB3.4.1.Explica o éxodo rural, a emigración a Europa, e a chegada de emigrantes ao noso país. Estándar
